Startups polo miúdo: Galiwonders, a axencia de viaxes online especializada no Camiño de Santiago,

A sección de "Startups polo miúdo" pretende ser ese pequena porta de entrada a coñecer proxectos galegos con tecnoloxía de fondo. Facémolo con moito mimo, poñendo foco no máis importante deste ecosistema: as persoas e os seus proxectos.

Hoxe estamos a falar con Sabela Gippini, cofundadora de Galiwonders. En esencia, son unha axencia especializada completamente en todo o relacionado ca experiencia, enfocada completamente no dixital, do Camiño de Santiago.

Sabela, imos ca tua entrevista!

1.     E logo... que? [Describe cunha frase a túa startup]

[Galiwonders]: Galiwonders é unha axencia de viaxes online especializada no Camiño de Santiago, que axuda a viaxeiros de todo o mundo a planificar a súa experiencia dende Galicia. Actuamos como intermediario local, conectando turistas internacionais cos mellores provedores galegos. Ofrecemos paquetes totalmente a medida e personalizables, adaptándonos sempre ás preferencias dos nosos clientes, e non ao revés. O noso catálogo inclúe todas as rutas máis emblemáticas do Camiño: o Camiño Francés, o Camiño Portugués, a Variante Espiritual... e moitas máis!

2.     E vos de quen vides sendo? [Describir brevemente o equipo fundador e como se coñeceu, onde estades ubicados..]

[Galiwonders]: A idea naceu da miña experiencia persoal. Chámome Sabela e fundei Galiwonders no 2016, tras máis de 4 anos vivindo en Irlanda. Dende alí percibín o enorme potencial que ten Galicia como destino turístico internacional. Empezamos pequenos, e hoxe somos un equipo de 17 persoas que traballan dende Pontevedra, aínda que sigo sendo a única socia.

3. Outra vaca no millo. [Cal foi o problema que queriades resolver cando lanzáchedes o proxecto?]

[Galiwonders]: No 2016, a oferta do Camiño de Santiago online estaba dominada por axencias de fóra de Galicia, cunha proposta moi cara e pouco personalizada. Pola outra banda, as axencias galegas tiñan un modelo tradicional, pouco adaptado á dixitalización. Galiwonders nace para cubrir ese oco: ofrecer unha experiencia completa, local e dixitalizada, dende aquí, para viaxeiros que queren reservar dende calquera parte do mundo. Queremos facer fácil o difícil, eliminando barreiras culturais e idiomáticas. Así que, se estás pensando en facer o Camiño de Santiago ou coñeces alguén que esté empezando a planificalo, en Galiwonders preparamos unha Guía Práctica con todo o que necesitas saber. Pódes descargála no seguinte enlace: https://galiwonders.com/guia-practica-del-camino-de-santiago/ 

4.     Malo será que non academos... [Próximos pasos. Que obxectivos tedes?]

[Galiwonders]: Agora que o noso modelo de negocio está consolidado, os obxectivos son claros: crecemento e diversificación. Queremos entrar noutros mercados e explorar novos produtos turísticos en Galicia, como o turismo enolóxico, termal ou industrial. Ademais, soña connosco: e se Galicia se convirte nun destino top para nómadas dixitais e traballadores en remoto? Para iso nace KnowmadTribe. Unha nova startup que comezamos a cociñar este ano en Turislab.

5.     Cantos cartos tedes no banco? [Esta pregunta busca entender en que momento vos atopades: se fixechedes algunha rolda ou estades agora en rolda ou facedes bootstraping. A idea é que respondades unha horquilla ou que digades que agora mesmo "temos pasta porque fixemos a rolda en...." similar. Esto servirá para darvos visibilidade cos inversores :) ]

[Galiwonders]: Tivemos a sorte de iniciar nun sector con barreiras de entrada e custos de arranque relativamente baixos. Grazas a iso, puidemos crecer de forma orgánica e con capital propio, mediante bootstrapping. Cunha facturación de case 3 millóns de euros, estamos cómodos para seguir auto-financiando os nosos proxectos, polo menos por agora.

6.   Na miña terra, faise así. [Cáles son os vosos valores? Traballo remoto ou presencial? Como coidades do talento?]

[Galiwonders]: En Galiwonders apostamos por un modelo de traballo flexible que combina o presencial e o remoto, adaptándonos ás necesidades individuais. Cremos que o talento é o noso maior activo, por iso ofrecemos formación continua e fomentamos un ambiente laboral aberto, colaborativo e inclusivo. Ademais, a sostenibilidade é un dos nosos piares fundamentais. Estamos comprometidos co turismo responsable e procuramos integrar prácticas sostibles en todos os nosos procesos: dende a selección de provedores locais con certificacións de eficiencia enerxética ata o deseño de experiencias que respecten e potencien o patrimonio natural e cultural de Galicia. Para nós, coidar do talento e do medio ambiente é a mellor forma de coidar do futuro.

7.   Son máis listos ca un allo... [Un emprendedor de referencia ao que admires. Por que? Unha startup galega que recomendedes. Por que?]

[Galiwonders]: Unha emprendedora que admiro é Yaiza Canosa, un auténtico exemplo de enerxía e inspiración. Cada vez que escoito un podcast seu, recárgome de ideas e motivación. E falando de startups galegas, a miña recomendación é Salmoira, de Pontevedra. Son un exemplo perfecto de como combinar tradición e innovación. Cando visitas o seu local, transmítenche paixón, creatividade e moito cariño polo seu traballo.

8.    A camiño longo pasos pequenos. [Carta aos Reis Magos: Que falta no ecosistema emprendedor galego?]

[Galiwonders]: No ecosistema emprendedor galego fáltanos máis apoio na fase de crecemento e diversificación. Hai moitos programas e axudas para comezar, pero cando unha idea está validada e toca escalar, moitas veces estamos un pouco sós. Un maior asesoramento e máis ferramentas na fase scale-up serían o empurrón definitivo para moitas empresas.


Moitas grazas, Sabela, por falar tan profundamente do voso proxecto, compartir experiencias, aprendizaxes, etc con toda a comunidade.

Seguiremos compartindo máis historias reais de proxectos nados en Galicia nesta sección. E ti, queres aparecer neste espazo de ''Startups polo o Miúdo''? Contacta connosco en info@startup.gal