Startups polo miúdo: Innogando, unha Agrotech que axuda e mellora a vida dos gandeiros

Se algo temos claro nesta terra e que aquilo que non se comunica, moitas veces non existe. Por iso queremos poñer o foco no máis importante desde ecosistema: as persoas e os seus proxectos. As persoas  emprendedoras que están a traballar por revolucionar o panorama coas súas ideas innovadoras.

Desta volta tocoulle o turno a Innogando, unha Agrotech que axuda e mellora a vida dos gandeiros. Falamos co seu CEO & Co-Founder Elio López García e contámosche todos os segredos.

‍

1. E logo... que?  Describe cunha frase a túa startup‍‍

[Innogando]: Somos unha startup de Agrotech e axudamos ós gandeiros a mellorar a eficiencia e sustentabilidade das súas explotacións, á vez que lle proporcionamos tranquilidade a través dunha ferrementa tecnolóxica única, cun sistema de monitorización do gando moi completo e versátil..

‍

‍2. E vos de quen vides sendo? Describir brevemente o equipo fundador e como se coñeceu, onde estades ubicados....

‍‍[Innogando]: Elio López Garcia e Daniel Pardo Rus somos os co-fundadores de Innogando, e amigos dende pequenos. Unha vez botamos a andar este proxecto, rápidamente se uniron Carlota Antelo, Daniel Rizo, Braulio Méndez e Pablo López.

Estamos no corazón da Terra Chá Lucense, en O Arneiro (Cospeito), por iso temos contacto directo coas necesidades das explotacións tanto extensivas como intensivas, e combinamos o coñecemento tecnolóxico coa tradición gandeira local para ofrecer solucións innovadoras.

‍

‍3. Outra vaca non millo. Cal foi o problema que queriades resolver cando lanzáchedes o proxecto?‍‍

[Innogando]: Sabíamos de primeira man que o sector precisaba mellorar na xestión das gandarías, había que resolver a falta de eficiencia e control no manexo do gando porque afecta tanto ó rendemento económico das explotacións coma ó descanso do gandeiro. Partimos da base de que era necesario facilitarlle o control das reses e que puidera tamén previr posibles patoloxías, mellorando así a produtividade.

‍

4. Malo será que non academos... Próximos pasos. Que obxectivos tedes? 

‍[Innogando]: Os nosos obxectivos principais inclúen expandir a nosa presenza no mercado internacional, mellorar continuamente as funcionalidades de Rumi mediante avances tecnolóxicos e investigación, e colaborar con máis granxas e cooperativas para integrar a nosa solución a nivel global...

‍

5. Cantos cartos tedes no banco? Esta pregunta busca entender en que momento vos atopades: se fixechedes algunha rolda ou estades agora en rolda ou facedes bootstraping. A idea é que respondades unha horquilla ou que digades que agora mesmo "temos pasta porque fixemos a rolda en...." similar. Esto servirá para darvos visibilidade cos inversores :)

[Innogando]: Estamos nunha situación económica sólida tras completar unha exitosa rolda de financiamento en 2024. Isto proporcionounos os recursos necesarios para expandir as nosas operacións e continuar innovando no noso produto estrela: Rumi.

‍

6. Na miña terra, faise así. Cales son os vosos valores? Traballo a distancia ou en persoa? Como calidades do talento?

[Innogando]: Os valores que temos por bandeira inclúen a sustentabilidade, a innovación e a colaboración. Promovemos un modelo de traballo híbrido que combina o traballo remoto e presencial, permitindo flexibilidade e un equilibrio saudable entre a vida laboral e persoal.

Coidamos do talento ofrecendo oportunidades de desenvolvemento profesional, formación continua e un ambiente de traballo inclusivo e motivador.

‍

7. Son máis listos ca un allo... Un emprendedor de referencia que admiras. Porque? Unha startup galega que recomendas. Porque?

[Innogando]: Un emprendedor de referencia ó que admiro é meu pai, xa que con 70 anos acaba de sacar adiante outro proxecto co que fai alimentación innovadora para o sector gandeiro. O seu carácter innovador dende logo que nos inflúe a todo o equipo a seguir medrando e
validando as solucións que aportamos.

En canto a unha startup galega, recomendo Himikode, xa que están facendo solucións tecnolóxicas basadas en datos para a industria alimentaria, e colaboramos con eles en diversos proxectos co obxectivo de pechar o ciclo e chegar o consumidor final.

‍

8. A camiño longo, pasos pequenos. Carta aos Reis Magos: Que falta no ecosistema emprendedor galego?

[Innogando]: Falta un maior acceso a financiamento e recursos para startups en fases iniciais, así como máis programas de mentoría e apoio que conecten emprendedores con expertos e inversores a nivel global. Confío en que hai moitas boas ideas e potencial que precisan un empurrón para zarpar e por rumbo ó éxito empresarial.

‍

Moitas grazas Elio por participar e facer parte de este ecosistema en crecemento!

Volvemos a vindeira semana con outro protagonista, se queres aparecer neste espazo de ''Startups polo o Miúdo'' contacta connosco en info@startup.gal‍