A Axencia Galega de innovación e a Fundación DIDAC inician o ciclo de Conversas sobre deseño e procesos creativos para a innovación e a sustentabilidade cos gañadores dos Premios Galicia de Innovación e Deseño 2020 e 2021 na categoría de talento emerxente: Damián Calvo e Yarza Twins.

Damián Calvo. Graduado en Enxeñaría de Deseño Industrial e Desenvolvemento de Produto pola Universidade da Coruña. Foi membro do equipo de deseño de produto de Samsung Design Europe en Londres e recentemente incoporouse a compañía Dyson como deseñador industrial na nova sede global da marca ubicada en Singapur.
Yarza Twins. Master of Arts Communication Design no Central Saint Martins (Londres). As irmáns Eva e Marta Yarza desenvolven proxectos de tipografía, 3D, animación, deseño editorial e de marca, desenvolvemento web e ilustración para Adidas, MTV, Converse, Smirnoff ou HP.
Esta conversa será a primeira das citas bimestrais que serán retransmitidas en streaming para abrir unha ventá ás tendencias máis efervescentes a nivel global en diversas especialidades do deseño, da man de deseñadores e deseñadoras galegos novos con gran proxección internacional.

O ciclo de conversas é unha iniciativa desenvolvida no marco da creación da Rede internacional de profesionais do deseño galego, un dos eixes do Programa de Deseño para a Innovación e a Sustentabilidade 2024 – DIFERENZA.